ओवी - स्त्री-दिनाच्या शुभेच्छा

पहिली माझी ओवी ग गावाच्या मातीला
सुगंधान पाहिलं नहाण पोरीच्या जातीला

दुसरी आली ओवी माझी आईसाठी मनात
हसता हसता राब राबुनि हसु ठेविले ओठात

पुढची बाई ओवी ग उन्हं रांगती अंगणी
मायेच्या किरणान उदंड दिलंय आजीनी

चवथी माझी ओवी ग विमानाची ऊडी ती
बहीण-बाई तुझी गाणी आली माझ्या संगति

पाचवी माझी ओवी ग मैत्रि माझी गुणाची
अंतराला कापुन जिने गाठ बांधली खुणेची

सहावी माझी ओवी ग शाळेसाठी गाऊ द्या
लिहिती झाले जिथे आता सुट्टीनंतर जाऊ द्या

सातवी माझी ओवी ग शेजारणिची आई ग
घरासारख घर जिने रहायाला दिलं ग

आठवी माझी ओवी ग अनोळखी बायांना
घरोघरी आनंदानी जपती ज्या घरांना

नववी माझी ओवी हा दिवा ठेवते शब्दांचा
बाई-च्या जळण्याला "तेवण" म्हणते शुचिता

नाही कोणी मोठा किंवा नाही कोणी लहान
जाण ठेवुनी जन्म जाऊदे हेच एक मागणं

- स्त्री-दिनाच्या शुभेच्छा -